Ngakchia hna an ngan a dam nakhnga le an thluak a that deuh nakhnga ca ah CHAMPS timi sii lei company pakhat nih 2020 February 25 Hakha Carson Hall ah cawnpiaknak le nuamhnak tete an tuahpiak hna tiah kan theih.
Hi kong he pehtlai in Hakha Cozah tualleng sianginn lutlai Sayamahci Pi Thla Zing nih, “Atu an kan tuahpiaktu hi sii lei company an si. Hakha khuachung biaknak lei tualleng ngakchia dihlak le cozah sianginn a kai mi taangli tang ngakchia poh sawm an si dih. Hi an kan tuah piaknak ahhin ngakchia minung 1000 leng cu an si lai. Tlunkalnak zong anmah nih an kan rin dih. Cun, ngakchia a ra mi poh hi minung 1 ah changreu 500 man cio an pek hna,” tiah The Hakha Post ah a chim.
Cun, hi an tuahnak hmun ah “ngakchia hna an ngandamnak ding le an cawlcangh ning a that deuhnak hnga,” timi tlangtar in Myanmar ram lemcang thiam le announcer minthang fitlaw San Htut nih cawnpiaknak a ngeih dih hnu ah ngakchia a ra mi chung in zuamnak an tuahter hna i, laksawng peknak zong an ngei.
