Ralkap uk kan duh lo ti langhternak ca ah Civil Disobedience Movement ah aa tel mi Inwa Bank riantuan Hakha khuasa Salai Francis cu cunglei nih a rian in an phuah tiah thawng kan theih.
Rian an phuah mi kong he pehtlai in Salai Francis nih, “Atu rian an ka phuah mi hi zung lei an palhnak a um lo. A hramthok tein kan nih zung hi cu CDM ah riantuan dihlak i tel lo ding in rak thanh cang mi a si. Kei cu CDM an thok ni bak in kaa tel i, rian an ka phuah lai ti zong hi kaa ruah ciami a si ko. Kan zung rian ngei hna nih rian chuahnak ca tial ding kong zong ah an ka chonh. Asinain, keimah nih ca tial loin, tihin keimah tein ka chuak ko lai ka ti hna i ka chuak ve ko. A hramthok tein ka rak i ruah cia mi a si ko,” tiah The Hakha Post ah a chim.
Salai Francis hi Inwa Bank ah riantuantu tling si rih loin ni hlawh in a lut mi a si. Ni hlawh in a tuan hnu ah riantuan tu tling ah cohlan ding a si. Cun, riantuan tu tling cohlan nakding zong Hakha Inwa Bank ah ca zong a tla cang mi a si tiah kan theih.
Salai Francis rian an phuah mi kong ah Inwa Bank Manager nih, “Francis hi riantuan tu tling a si rih lo. Nihlawh pek lawng in a tuan rih mi a si. Cun, atu rian kan phuahnak zong hi kanmah nawl si loin, Bank nih zulhphung a ser mi ning tein kan phuah mi a si. Bank ahhin zulhphung tha tein a ngei mi kan si. Amah zong nih zulhphung kan ngeih mi hi a theih mi a si ko. A theih ko buin zulhphung a buar, cun amah zong nih rian i dinh ding in timhlamhnak ka ngei cia ko a kan ti. Kanmah zong nih kan zulhphung ning tein atu ah rian kan phuah hi a si,” tiah The Hakha Post ah a chim.
Hakha Inwa Bank hi Central Bank of Myanmar nih a tlaih mi a si i, 2020 February thla ahkhan Hakha an hon. An zung azh riantuan dihlak minung 11 an um i, nihin tiang caan tling in Bank an hon rih tiah theih a si.
