Ralkap uk duhlonak langhternak ca ah tiin Civil Disobedience Movement (zung kai lo) cawlcanghnak ah aa tel mi Hakha i General Administration Department (GAD) zung riantuan hna cu an pule nih, “zung nan kai lo a si cun dan kan in tat hna lai” an ti hna tiah thawng kan theih.
Hakha GAD zung ah a kai mi min langhter duh lo pakhat nih, “Cunglei kan pule nih an kan ti mi a si. CDM ah aa tel mi kan dihlak in cu ni kha ni ah zung nan kai a si cun, dan kan in tat hna lai lo. Zung nan rak kai than lo a si cun, dan kan in tat hna lai an kan ti. Kanmah lei nih cun kai kan duh lo, aruang cu mizapi nih thimmi Cozah kuttang lawng ah riantuan kan i timh ca ah a si,” tiah The Hakha Post ah a chim.
Hakha khuachung ah GAD zung hi Peng, Pengkomh le Ramkulh tiin an um i, zung pathum fonh ah zung riantuan minung 200 leeng an si. Hi chung ah minung a tam deuh hi CDM cawlcanghnak ah an i tel tiah kan theih.
Zung kai lo ruang ah dantat nan si lai tiah an pule nih an timi kong he pehtlai in Hakha Penguk Zung Lutlai U Myint Oo nih, “Zung nan kai lo ahcun dan kan in tat hna lai tiah kan ti bal hna lo. Cun, zung kai hrimhrim uh tiah hramhram in kan hne fawn hna lo. Atu zung riantuan mi hna chung ah CDM cawlcanghnak ah aa tel mi hna zong anmah nih an duh a si ahcun i tel ko hna seh, zung kai a duh mi hna zong nih an duh ahcun zung kai ko hna seh. Mizeipoh hi mahle duhthimnak te kan ngeih dih cio. Bianabia ah, voksa duh mi nih voksa, arsa duh mi nih arsa ei ding a si ko. Voksa duh mi nih arsa ei hlah timi rikhiahnak zong a um lo. Chim duhmi cu zung kai a duh lomi nih kai lo khawh, kai a duh mi nih kai khawh a si ko. Cu a si caah kanmah lei nih hramhram in hneek ti bantuk a um lo. CDM ah aa tel mi hna chung in kai a duh than mi zong an um. Hi bantuk in an um ca ah kai nan duh a si ahcun, kai khawh a si ko ti lawng kan timi hna a si. Kan hneek hnanak zeihmanh a um lo,” tiah The Hakha Post ah a chim.
Myanmar ram ralkap nih February 1 in mizapi thimmi le sermi Cozah sin in uknak a laak hnu Myanmar ram hmunkip ah lamzawh dih a rak si. Chin Ramkulh chung zong February 7 in lamzawh thok a si i, pehzulh in nihin tiang lamzawh mi an um rih tiah kan theih.
