Nihin March 12, Hakha Sii-innpi ah Ralkap le palek nih umhmun an khuar ti mi cu CDM a tuah mi sii-inn riantuantu hna an luh hnawh mi hna a si tiah kan theih.
Hakha Sii-inn ah palek 30 hrawng, ralkap 20 hrawng, ti kahnak motor pakhat le thongtla motor pakhat in an fuh hna.
Hi kong he pehtlai in Ralkap ser mi Council Chairman Pu Ngun San Aung nih, “Security ca ah an luh mi a si. CDM a lut mi hna kha, nan tuan lai maw tuan lo tiah an hal hna lai i kan tuan lai lo an ti ahcun zaanlei suimilaam 3:00 hlan ah riantuantu umnak quarter in an chuahter hna lai. Cun ralkap lei in riantuantu an rak thlah hna lai,” tiah a chim.
Hi kong he pehtlai in Hakha Sii-inn Uk Dr. Mang Biak Kung kan chawnh nain thil sining a buaibai tuk lio a si ca ah bia a kan let kho rih lo.
