Nay Pyi Taw ah bawi pawl inn a rungvengtu palek battalion in palek pakhat cu rammi lei CDM cawlcanghnak ah a lut i tlaih hren lio mi President U Win Myint kong a phuan.
Palek battalion No. 8 cu Nay Pyi Taw ah Hluttaw lutlai pawl inn rungvengtu an si i palek Ko Lin Lin Htoo (Lah-205530) cu mizapi lei ah a hung dir.
“Ka rammi a thattu si ka duh lo. Cucaah khonh ka hal i battalion in ka rak chuak. Nihin ah cun CDM ka tuah ti in ka thanh,” tiah Ko Lin Lin Htoo nih a chim.
Ralkap nih uknak chuh ni, February 1 tiang Pyidaungsu Hluttaw Khuahun inn rungvengtu tuanvo pek kan si i, cu ni zaanlei sang in zung ah kan kir tiah a chim.
“Chun ah kan dihlak in a sawng ah kan it. Zei hmanh an kan tuahter lo. Cun thilri fim hnu in Wa pura pawng (Hluttaw hauka pawng) palek zung ah an kan kalter. Cuka ah cun kan riak i a thaizing ah President U Win Myint an chiahnak inn ah kan kal,” tiah a chim.
President U Win Myint cu bawi inn lak ah pakhat a si mi A-29 ah an chiah i a chung he a leeng he ralkap le palek nih an cawngh tiah a chim.
“Inn chung ah ralkap an um i a leeng ah palek le ralkap an um. Cuka kan phanh hnu in guard cawnghnak tower paruk kan sak. President le a nupi cu zinglei le zaan lei ah inn hmai ah lam an leeng tawn. Cu lio ahcun tower cung in tha tein kan cawngh hna,” tiah a chim.
Cu inn ah cun rawl chaan ding in motor a hme mi pakhat le minung pahnih an lutchuak zungzal, ti zong a chim. (Ref: DVB)
