Zomi Revolution Army-Eastern Command (ZRA-EC) ah ralkap a ṭuanmi minung pathum le ZRA a dirkamhtu minung 15 hna i an inn pawl cu CDF-Tonzaang nih an kharpiak hna, tiah theih a si.
Tonzaang khua ah CDF-Tonzaang nih inn an kharpiakmi hna ZRA-EC ralkap pathum cu Commander Kham Min Thang, Second Commander Lucas Lian Tuang le Kham Sian Lian an si, tiah CDF-Tonzaang thawngthanhnak ah an min le an rank he an langhter.
Inn kharpiakmi minung 18 lak ah ZRA-EC ah hruaitu an si tiah an timi hna Thang Kho Lian, Mang Nun Sang, Pau Sian Sang, Kai Khan Mung, Mung Lan Thang (Pupu Thang), Hang Khen Mang, Cin Khen Thawn le Pastor Sia Lian zong an i tel.
A cunglei inn kharpiakmi minung 18 hi ZRA he pehtlaihnak an ngei timi a fian hnu ah action kan laakmi a si, tiah CDF-Tonzaang nih an langhter.
ZRA he pehtlaihnak an ngei ti ruang ah CDF-Tonzaang nih inn 23 an rak kharpiak hna nain inn nga tu cu ZRA he pehtlaihnak an ngei timi a fian lo caah dantatnak in an luatter ṭhan hna.
Dantatnak in a luat ṭhanmi minung panga cu SAC palek pension Langh Kho Pau, penguk zung mawtaw khaltu Kham Thawn Mang, dawrngei Naing Ngai Nuam, Zam Kho Pau le Naing Dei Ciang hi an si, tiah CDF-Tonzaang nih a langhter.
