Falam peng chung ah CDF-Ngawnngam ti mi hriamtlai bu pakhat an dirh mi kong he pehtlai in CNF/CNA pehtlaihnak a ngei lo, tiah CNF/CNA chimnak nawlngei Salai Htet Ni nih a chim.
February 27 ah CDF-Ngawnngam ralkap pawl hmanthlak pahnih cu Facebook ah an tar i Ngawn CDF an si tiah CDF-Ngawnngam hriamtlai bu ser a sinak kong mizapi sin ah theihternak an tuah.
Falam peng chung ah CDF-Ngawnngam ti mi hriamtlai bu thar ser a si mi kong he pehtlai in Ngawn Union Council (NUC) nih February 28 ah duhlonak ca an chuah i CNF cung ah sual a phawt.
CNF/CNA chimnak nawlngei Salai Htet Ni nih, “Ngawn Union Council ca an chuah mi bantuk in CNF nih voi khat hmanh an ram ah sakhaan kan chia lo, CDF-Ngawn an dirh mi kong zong ah kanmah he pehtlaihnak a um lo. Ngawn Union Council nih anmah ruahnak in a kan puh mi a si,” tiah a chim.
Ngawn Union Council nih CDF-Ngawnngam cu CNF/CNA kuttang hriamtlai bu tiah a ti mi kong he pehtlai in Salai Htet Ni nih cun “CDF-Ngawn hi an dirhnak a sau rih lo mi si dawh a si. CC chungtel zong a si lo pin ah CNF/CNA kuttang ah a um mi zong a si lo. Cun, CNA nih zei bantuk pengtlang hriamtlai bu hmanh hi kuttang ah a chia ballo. Atu bantuk in ahmaan lo in an chim mi hi ahohmanh nih zumh ding a si lo,” tiah a chim.
