Chin Brotherhood chungtel a simi CDF-Matupi Brigade (1) le Chinland Council chungtel a simi CDF-Matupi Brigade (2) karlak ah remnak a um khawh nakhnga Matupi biaknak lei upa hna an i zuam cuahmah, tiah thawng kan theih.
Matupi biaknak lei hruaitu hna i fonh in remdaihnak sertu bu Peace Commission an dirh i, CDF-Matupi Brigade (1) he ton biaruahnak voi 1 zong an ngei cang.
CDF-Matupi Brigade (2) lei zong nih CDF-Matupi phu hnih karlak ah remnak a um khawh nakhnga le Matupi ralzaam pawl inn an hlam khawh nakhnga kan i zuam lai, tiah October 21 ah thawngthanhnak an tuah.
Matupi mizapi ngandamnak, fimcawnnak, ukhruainak le a dangdang ṭhanchonak rian lei zong ah Chinland Council he rian kan ṭuan ṭi lai tiah CDF-Matupi Brigade (2) nih a langhter.
Cu lawng si loin Chin miphun sersiamnak, Chinram kilvennak le Chinmi zalennak rian ah Chinland Council chungtel ralkap bu hna he pehtlai in ral kan do lai, tiah CDF-Matupi Brigade (2) nih a langhter.
