Chinland Council (CC) chungtel Kanpetlet Council le CDF-Kanpetlet Battalion 7 umnak hmun lei ah AA le Chin Brotherhood (CB) nih thazaang tampi in ral lam an sial caah kahdohnak a um sual tiah mizapi an thin a phang, tiah theih a si.
AA le CB ralkap pawl cu October 11 le October 12 ah CC chungtel CDF-Kanpetlet Battalion 7 hmunkhuarnak pawng tiang ral lam an sial, tiah tualchungmi nih an chim.
CC chungtel Kanpetlet Council le CDF-Kanpetlet Battalion nih kap hnih karlak kahdohnak a um dingmi an duh lo caah AA le CB pawl kir ding in an fial hna nain AA le CB lei nih an duh lo.
Khuabawi pawl zong nih kahdohnak a um nakhnga lo biaruahnak an ngeih hna nain CB chungtel CDF-Kanpetlet lei nih an duh lo, tiah Kanpetlet tualchungmi pakhat nih a chim.
CB le AA lei nih pehtzul in ral lam an sial ahcun kap hnih karlak kahdohnak a chuak ding dirhmun a si caah tualchungmi pawl cu an lungre a thei ngaingai.
October 8 ah khan Kanpetlet Council le CDF-Kanpetlet Battalion 7 nih Chinland Council he pehtlai in kan dir lai tiah cathanh an chuah hnu in CB le AA lei nih atu bantuk in CDF-Kanpetlet Battalion 7 hmunram lei ah ral lam sialnak an tuah hi a si.
