Daai Regional Council (DRC) tang ah a um mi CDF-Daai ah i fonh ding in Kkei Sing Battalion cu CDF-Kanpetlet in a chuak thai cang, tiah theih a si.
May 16-17 ah khan Paletwa, Matupi, Kanpetlet le Mindat ah a um mi Daai miphun hna tonpumhnak an rak tuah i, DRC hi an rak dirh.
Daai hmunram ah a um mi mizapi cu DRC ukhruainak pakhat tang ah um ding in le peng pali chung ah a ummi Daai hriamtlai vialte cu DRC nih a ser mi CDF-Daai ah i funtom ding in khuakhaannak an rak ngei.
Cucaah, DRC tawlrelnak le tlangtlaknak in a kal mi CDF-Daai ah i funtom ding in Kkei Sing Battalion cu CDF-Kanpetlet in an chuahnak hi a si.
Peng pali ah a um mi Daai miphun le hriamtlai pawl funtomnak rian an thawk lio a si caah CDF-Daai cu Chinland Council zong in a chuak i, CDF-Matupi Brigade (2) ah a ummi Lisan Battalion zong CDF-Matupi in a chuak.
Daai hriamtlai hna funtomnak rian an tlamtlinh hnu ah DRC hi Chinland Council lei ah maw a um lai, Chin Brotherhood lei ah dah a um te lai ti mi fiang in theih a si rih lo.
