Kahdohnak in a zaam mi SAC ralkap 17 cu hriamnam he an nung in kan tlaih hna, tiah CDF-Asho nih nihin January 27 ah theihternak ca an chuah.
An tlaih mi hna SAC ralkap 17 hi Rakhine ramkulh, Ann khua kahdohnak in a zaam mi an si i, meithal zun 8 le zenkuan cheukhat he CDF-Asho nih an tlaih hna hi a si.
CDF-Asho chimnak nawlngei Salai Ro Chin nih, “Hi SAC ralkap 17 hi cu an zapi in hmun khat ah kan tlaih hna. Hmun dang, caan dang ah a dangdang in kan tlaih mi SAC ralkap pawl zong an um. Hriamnam aa ken mi an um bang in a cheu cu ramlak ah hriamnam a hlonh ta mi le an sakhaan ah a thup ta mi zong an um,” tiah a chim.
Kum 2 chung ah SAC ralkap 200 hrawng kan thah hna i a dang 150 hrawng hi an nung in kan tlaih hna, tiah January 21 ah khan CDF-Asho nih theihternak ca a rak chuah.
CDF-Asho nih an tlaih mi SAC ralkap pawl cu sii-ai thlopbulnak ṭha tein an tuah hna i eidin tirawl lei zong in ṭha tein an cawmken hna, tiah theih a si.
