CCA nih Myanmar ramchung um Chinmi unau tanghra Distinction in a aung mi laksawng pek an timh hna tiah CCA General Secretar Rev. Doctor Charity Htoo sin in August 25 ah kan theih.
Chin Christian Asian (CCA) General Secretary Rev. Dr. Charity Htoo nih, “Myanmar ramchung khuakip um chinmi unau tanghra Distinction in a aung mi dihlak laksawng pek kan i tim. Chin Ramkulh Social Affairs Minister Pu Pau Lun Min Thang he atu kan i ruah mi hna ahcun 3D,4D,5D,6D a hmu mi lawng laksawng pek kan timh hna. Cun 1D le 2D a hmu mi hi cu Certificate in pek kan i tim. A ruang cu tangka lei ah kan chambau lai kan phang. Asinain budget kan ngeih le bawmhnak petu dang hna an um a si ahcun bawmhnak tangka zong kan pek ko hna lai. Kan i timhtuah cuahmah lio a si,” tiah The Hakha Post ah a chim.
August 20 ah Chin Ramkulh chung in Art lei ah All Distinction in le Myanmar ramchung ah Art lei in mark a sang bi a kan hmuhpiaktu Salai Bi Htaw laksawng peknak kan ngei. Cu hnu ah Chinmi dihlak chung ah All Distinction a hmu mi zong an tampi ve ko kan pekpiak ve hna u tiah mizapi nih an kan ti. Cun, Distinction a hmutu dihlak hi cu kan pekpiak ko hna u tiah an kan ti chih, tiah Rev. Doctor Charity Htoo nih a chimchap.
“Cun 2D in 6D tiang a hmu mi pawl cu ramdang lei ah sianginn kai an duh a si ahcun Scholarship a tuah mi sianginn he kan pehtlaihpiak hna lai. Australia lei le a dangdang ah sianginn kai a duh mi hna cu mirang ca a chei mi le anmah nih an duh a si ahcun kaiter a si lai. Cun ramdang sianginn kai a duh mi nih kanmah nih cun an dihlak in kan pehtlaih khawh hna lai lo ca ah anmah nih kan pehtlaih hna sehlaw kan tawlrelpiak hna lai. 1D a ngah mi zong nih kai an duh ahcun kan tawlrelpiak thiam hna lai,” tiah Rev. Dr. Charity Htoo nih a chimchap.
Chin Ramkulh chung le Myanmar ram chung um Chinmi Distinction in a aung mi hna atu tiang cazin an lak mi ah minung 520 hrawng lawng an si rih. D a hmu mi nan theih mi an um a si ahcun pehtlaih khawh an si. America, Norway, Netherland, Australia hna nih bawmhnak an an pek mi a tlawm le a tam zoh in laksawng pek an i tim tiah kan theih.
Note/ Hi hmanthlak hi 2020 kum tanghra camipuai ah Myanmar ram huap in mark sang cem a hmu mi Chin pate a si. CCA nih conglawmhnak an tuahpiak lio
