Chinland Council (CC) ralkap bu nih Chin Brotherhood (CB) chungtel CDF-Matupi Brigade (1) ralkap 4 an tlaih hna, tiah CDF-Matupi Brigade (1) nih nihin July 17 ah theihternak a tuah.
“July 7 lio i SAC ralkap he i kahdohnak ah hliamhma a pumi CDF-Matupi Brigade (1) ralkap pali cu nu le pa sin an tlawn lio ah CNF/CNA hruaimi hriamtlai bu nih aruang um lo in an tlaih hna,” tiah CDF-Matupi Brigade (1) nih a langhter.
July 12 zong ah Matupi zatlang ngandamnak rianṭuantu pahnih cu CNF/CNA hruaimi hriamtlai bu nih an tlaih hna i nihnih chung an hren hna pin ah June 24 thawk in Matupi peng ralzaam camp cheukhat ah eidin tirawl le sii-ai phakter lo ding in khamnak an tuah, tiah CDF-Matupi Brigade (1) nih sual a phawt chap.
Atu bantuk in CNF/CNA hruaimi hriamtlai bu hna nih ngandamnak lei rianṭuantu le hriamnam aa put lo mi ralkap pawl tlaih khihnak a tuahmi nih SAC ralkap dohnak rian a khul a fumter caah hi bantuk thil hi tuah ti lo ding in le tlaihmi vialte thlah dih ding in CDF-Matupi Brigade (1) nih theihternak ca a chuah.
