Chinland Council (CC) nih a kalpimi policy ning in kan kal lai tiah Kanpetlet Council le CDF-Kanpetlet Battalion 7 nih October 8 ah theihternak an tuah.
Kanpetlet peng chung i CC chungtel (Kanpetlet Council le Battalion 7) le Chin Brotherhood (CB) chungtel hna karlak ah raldohnak lei le ramkhel rian lei ah hmun khat te ah rianṭuan ṭi kho ding in ton biaruahnak an rak ngei nain CB lei nih ningcang loin khuakhaan lairelnak an ngeih ruang ah CC lei nih atu bantuk in theihternak an tuah hi a si.
CC chungtel Kanpetlet Council le CB chungtel hna karlak ah voi 2 tiang ton biaruahnak an ngei cang ko nain CB lei nih CC lei sawm loin anmah tein thimnak an rak tuah caah CB lei nih phung an buar, tiah Kanpetlet Council nih a mawhchiat.
Cucaah Kanpetlet Council nih cun Chin miphun sersiamnak le Chinram sersiamnak rian ah mizapi le CC he fek tein kan dir lai tiah a thanh.
CDF-Kanpetlet Battalion 7 zong nih, “Kanpetlet peng chung raldohnak le ramkhel rian kong ah Kanpetlet CB chungtel hna he voi 3 tiang bia kan i ruah cang ko nain kanmah sawm loin le theihternak tuah loin anmahte in thimnak an tuah,” taih a langhter.
Cucaah, CDF-Kanpetlet Battalion 7 cu CC chungtel a simi Kanpetlet Council kal ning in kan kal ve lai, tiah theihternak an tuah hi a si.
