Chinland Council (CC) le Interim Chin National Consultative Council (ICNCC) i fonh in Chin National Council (CNC) dirh ding in lungtlinnak an ngeih mi cung ah NUG le Karenni National Progressive Party (KNPP) nih lunglawmhpinak ca an ṭial, tiah theih a si.
Mizoram Chief Minister Pu Lalduhoma hruaimi remdaihnak sertu bu tlangtlaknak in CC hruaitu hna le ICNCC hruaitu hna cu February 26 ah Aizawl khua ah tonnak an ngei i, CC le ICNCC i fonh in CNC dirh ding in minsen thutnak an ngei.
Chin miphun dohthlennak ah phu hnih in aa ṭhen mi CC le ICNCC karlak ah atu bantuk in biaruahnak tein hmun khat ah i fonh ding in biachahnak an ngeih khawh mi cung ah NUG nih lawmhpinak bia a chim i atulio Myanmar ram dohthlennak ah zohchunh awktlak nan si, tiah a langhter.
Cu lawng si lo in KNPP zong nih atu bantuk in CC le ICNCC an i fonh khawh mi kong ah lunglawmhpinak bia a chim i hmailei Federal Democracy rampi serhnak ah CNC he rian kan ṭuan ṭi lai, tiah a langhter.
