CBC nih thawngfianhnak tuah mi kong Minister Pu Soe Htet nih fianternak tuah
Chin Baptist Convention (CBC, Falam) nih Mindat khua ah a voi hnihnak Chin Peace Forum tuah a timh mi Chin Ramkulh Cozah nih nawl a pe lo, tiin thawngfianhnak an tuah mi kong he pehtlai in Chin Ramkulh Cozah Chimphuannak Nawlngeitu Sipin Minister Pu Soe Htet nih January 30 ah The Hakha Post ah fianternak a tuah.
“Hihi telephone in kan i pehtlaihnak khul a nuar deuh ca ah a si. Ramrilei Minister le Chief Minister he phone kan i chawn i nawlpek an si ko. January 29 zinglei 9:11 tluk ah Pu No Than Kap zong ka hei chawnh ko. Asinain, an duhlo i a si lai. Thawngfianhnak zong an tuah i a ruah awk ka hngal lo ngai,” tiah Minister Pu Soe Htet nih The Hakha Post ah a chim. CNF/A tel ruang ah dawnkhantu a um maw, annih cu Nationwide Ceasefire Agreement (NCA) ah minthu cang mi an si ko tung, ti kan hal tik ah, “Hihi cu Ramrilei Minister nih a hngalh bik lai.
“National Reconciliation and Peace Centre (NRPC) nih zeitluk tiang dah ri a khiah le a kham cu ka hngal lo. Cun, a voi khatnak Falam khua an tuah lio zong ah CNF/A an i tel ko i atu zong an i tel lai lo an ti nain Palai minung 8 cu Mindat khua ah an rak phan cang. Thawngfianhnak zong ah an i tel ko. Hi kong tu hi cu keimah he aa pehtlai dih mi si loin Chin Ramkulh Cozah Chimphuannak Nawlngeitu pakhat dirhmun in ka hngalh tawk ka chim mi tu a si,” tiah Minister Pu Soe Htet nih kan biahalnak a kan leh.
CBC, Falam (Chin Shalom Mission Committee) nih, “A hlankan tein tuahnak nawl kan hal ko hna. Phungphai bantuk in a dotdot in kan hal ko hna nain an kan pe duh lo. Hmailei ah Phunghram le hmanlio mi upadi ning in kan pehzulh peng thiamthiam ko lai,” tiah cathanh an chuah i Chin Ramkulh Cozah lei nih hihi tuahnak nawl kan pek ko hna. Kan i pehtlaih ning khul a nuar deuh ca ah a si, nawl kan pek ko hna, tiah an fianter ve.
