CBC hruainak in tuah timh mi Chin Peace Forum cu Chin Ramkulh Cozah nih nawl a pek hna lo ca ah thawngfianhnak an tuah i cathanh zong an chuah Chin Baptist Convention (CBC, Falam) hruainak in a voi hnihnak Chin Peace Forum cu Mindat khua ah January 28 in 31 tiang tuah timh a si nain Chin Ramkulh Cozah nih nawl a pek hna lo ca ah CBC upa hna nih January 29 ah mizapi sin thawngfianhnak an tuah i cathanh zong an chuah, tiah kan theih.
Hi Chin Peace Forum hi Chinmi kan i naihniam khawh deuh i lungkhat tein rian kan tuanti khawh nakhnga ti mi saduhthah he tuah mi a si. Ramchung ramleng in ramkheel party hruaitu hna, Khuanu Khuapa, Mino hruaitu, Nu hruaitu, CSOs hruaitu, le Biaknaklei hruaitu upa hna sawm in tuah timh mi a si khual zong Mindat khua an phan cang nain Chin Ramkulh Cozah nih tuahnak nawl a pek hna lo ca ah atu bantuk in thawngfianhnak le cathanh an chuah hi a si, tiah kan theih. Cathanh an chuah mi chung in cheukhat cu hitihin a si. “A voi 2nak Chin Peace Forum (CPF) cu Mindat khua 2020 January 7 ah tuah ding in CBC GS Rev. Dr. Lawha Ling nih Peng tuanvo ngeitu sin ah nawl halnak ca a tial. 2020 January 16 ah, CNF/A an i tel ding a si ahcun National Reconciliation and Peace Centre (NRPC) nih theihpi a herh. Cun, CBC cu Biaknak Phu a si ca ah ramkheel kong i tel loin Biaknaklei kong lawnglawng tuah ding in tuanvo ngeitu upa nih biakamnak he ca rak tial than u, ti a si. Chin Ramkulh Cozah Chief Minister Pu Salai Lian Luai nih 2020 January 25 ah Mindat Pengkomh le Penguk a auh hna i CBC nih tuah timh mi ah hin CNF in upa 8 hi NRPC nih nawl a pek hna lo ca ah an i tel ve a si ahcun hi puai hi nawl pek lo ding in a chimh hna i January 26 ah Rev. Dr. Lawha Ling sin ah thawng an thanh than. Rev. Dr. Lawha Ling nih CNF an i tel lai lo. Tuahnak nawl kan pe ko u, tiah January 27 ah ca a tial than. January 27 thiamthiam ah CNF an i tel hrimhrim lai lo, ramkheel kong kan ceih hrimhrim lai lo, kan ceih ahcun upadi ning in dan nan kan tat lai, tiah Rev. Dr. Lawha Ling, Pu Thang Ling, Pu Bawi Thang Khe le Rev. Dr. Thiam Uk nih min an thut. January 28 ah Mindat tuanvo ngeitu nih, Cozah lei in nawlpeknak ca a phanhlo ca ah nawl kan in pe hna lo i nan tuahchih ahcun upadi ning in dantat nan si lai, tiah Rev. Dr. Lawha Ling sin ah ca a phan than. Cucaah, CBC lei nih Cozah tuanvo ngeitu sin ah a dotdot in ca kan tial ko, a hlankan tein ca kan tial ko nain le CNF zong an i tel lai lo, tiah biakamnak he min kan thut ko nain nawl an kan pek hlei lo ca ah hihi cu kan dohkalh ve. Hihi hmailei zong ah Phunghram le hmanlio mi phunghram he aa tlak in kan tuah te ding thiamthiam a si, ti hi ramchung ramleng in siseh, Myanmar rammi dihlak nih theih ding ah thawngfianhnak kan tuah,” tiah cathanh an chuah mi ah an tial. “Chinmi hi mah Pengtlang chung hmanh kan i daw kho lo. Pengtlang dangdang he cun kan i hlat chinchin. Cucu, hmun khat ah um, i naihniam deuh in um, i sikvelh zong ah i rem than in hmailei ah kalti than, dawtnak hri fehter ti hi kan saduhthah a si. Asinain, nawl an kan pek lo tik ah kan ngaihchia ngaingai. Ngakchia zong kan si lo. Ningcang tein le phungphai ning tein kan tawlrel ko nain tuahnak nawl an kan pek lo mi hi cu kan lungfak ngai ko,” tiah CBC AGS Rev. Dr. Thiam Uk nih The Hakha Post ah a chim. A voi khatnak Chin Peace Forum cu 2019 January 16-19, Falam khua ah an rak tuah i khualtlung minung 140 hrawng an rak si. Tutan hi Chin Ramkulh Cozah nih nawl a pek hna lo ca ah an leet i hmailei ah Phunghram he aa tlak in kan tuah thiamthiam lai, tiah cathanh an chuah. (By: KB)
