Chin Brotherhood nih an laak mi Matupi khua ah khuami milu 2,000 hrawng an kir cang, tiah CDF-Matupi Brigade-1 ṭuanvo ngeitu nih a chim.
CDF-Matupi Brigade-1 ṭuanvo ngeitu Salai Bawi Uk nih, “Atu tiang ah minung 2,000 hrawng an rak kir cang. A rak kir cuahmah mi zong an um. Zarh khat hnu zarh khat in milu an karh,” tiah Chin World ah a chim.
Matupi khua ah milu 10,000 hrawng an rak um i Matupi khua laak kahdohnak ruang ah kiangkap khuate le Mizoram lei ah an zaam dih hna.
Matupi khua cu AA le CB nih 2024 June 29 ah an rak laak khawh i, atu ah cun khuachung ah a um mi bomb rap pawl an thianh dih cang nain SAC ralkap sakhaan kiangkap ah bomb rap an um rih kho an ti caah pehtlai in bomb rap thianhnak an tuah, tiah theih a si.
