Lawngtlai ah aa dormi CB chungtel CDF-Matupi Brigade (1) dirkamhtu ralzaam upa pakhat ralrin pek a ton caah Lawngtlai ah CB lei dirkamhtu upa pawl ṭhutdir a har tiah ralrin pek a tongmi Pu Bupheuh nih a chim.
Lawngtlai khua pawng Saikah ralzaam camp ah a ummi Pu Bupheuh nih, “CC a ṭanh lomi hna caah cun Lawngtlai ah ṭhutdir hi a har ngai. Naite khan YLA zung ah an ka auh i kut an ka thlak,” tiah a chim.
YLA nih ralrin an pek ruang ah Pu Bupheuh hi Lawngtlai in a zaam tiah online ah bia a chuak nain amah Pu Bupheuh pumpak nih cun “Ka zaam bia a si lo. Damlo ruang ah Aizawl sizung ah ka um ta bia a si,” tiah Hakha Post ah a chim.
Hi kong he pehtlai hin Matupi ralzaam upa pakhat nih, “Pu Bupheuh hi mah hlan zong ah YLA nih ralrin an rak pek lengmang. Ralzaam camp ah khrihfabu dirh a timh i mizapi nih an duh lo caah an report i YLA nih ralrin an pek tawn,” tiah a chim.
YLA hruaitu pakhat nih, “Pu Bupheih i Office ah voikhat kan auh i, biaruahnak kan ngeih hnu ah a umnak Camp in a zaam colh. Cun, kan hnu ah Chinland Cozah Chief Minister Pu Pa Thang te Lawngtlai an rat ah, report an rak tuah i, Lawngtlai ah a rak ra,” tiah The Lairam Times ah a chim.
YLA nih voi 5 voi 6 hrawng an ka bengh, an ka thongh tiah Pu Bupheuh pumpak nih a chim nain YLA upa pakhat nih cun, “Ralzaamnak ah Khrihfabu dirh lo ding timi zong Khrihfabu a dirh hlei ah, khuatlang i thithruainak nawl zong a zulh duh lo caah voihnih kan beng, kan vel lo,” tiah a chim.
Chinram dohthlennak ah CB le CC tiin phu hnih in an i cheu hnu ah Lawngtlai Matupi ralzaam fimcawnnak lei zong ah CB sianginn le CC sianginn tiin i ṭhencheunak a chuak, tiah thawng kan theih.
