Hakha, Cawbuk sang, khuabawi Pu Than Lwin Oo nih a duh poh in Cawbuk vawlei hmun a zuar mi kong ah inn 230 nih minsen thut in a rian phuahpiak ding in Cozah sin ah an hal tiah thawng kan theih.
Hi kong he pehtlai in, Cawbuk sang A Lamkip thanchonak bu Lutlai Pu Ni Kam nih, “Sang mizapi theihter loin amah nawl in Cawbuk vawlei hmun 40/50 a zuar. Cun, sang chung i a ummi sifak santlailo le nuhmei hna kha innhmun kan pek hna lai tiah a hlen hna i tangka sing 1, sing hnih le cheu in minung panga a hlen hna. Innhmun zong a pe fawn hna lo. Cun, tangka a laak mi hna zong a khirh fawn hna lo. Hi bantuk in amah pumpak hlawknak lawng a kawl i sang thancho nakding ca ah zeihmanh a tuah lo. Hi bantuk in a si ca ah a rian phuahpiak ding in Cozah sin ah kan hal hi a si,” tiah The Hakha Post ah a chim.
Pu Than Lwin Oo a rian phuahpiak ding in 2020 July thla ahkhan Cozah sin ah an hal cang nain nihin tiang Cozah lei nih zeihmanh lehnak a um lo i, lamzawh in duh lonak langhter an i tim tiah kan theih.
“A rian phuahpiak ding in Cozah sin ah July thla chung ahkhan kan hal. Minister Pu Sui Thio sin zong ah pumpak in kan hal, phone kan chawnh. Kan in tawlrelpiak hna lai tiah an ti nain nihin tiang zeihmanh lehnak a um lo. Cozah lei in zeihmanh lehnak a um lo ca ah lamzawh in duhlonak kan langhter lai. Lamzawh nakding ca ah ca zong kan chiah cang,” tiah Pu Ni Kam nih a chimchap.
