Hakha CACC Nunphung le Aw-mui lei Committee (Culture & Audio Visual) tawlrelnak in Zawltling le Nganbawm tuanbia kha lemcang muicawl (movie) thlak ding in January 25 Nunphung lei committee meeting nih biachahnak a tuah.
“Kan nunphung, kan tuanbia le kan holh hi mino thangthar hna nih an theih an hngalh le an i nunpi i thapek duhnak thinlung zong an ngeih khawh nakding ah ti in hi lemcang muicawl (movie) hi thlak kan i timh mi a si. Thlak ding mi min (title) cu ‘Zawltling le Nganbawm’ tuanbia kha committee nih an fehter. Hi kan thimnak a ruang cu kan pupa nunphung ah roling le tuanbia ngei cia mi a si i, mino zong nih theih le hmuh an duh ngai lai tiah kan ruah,” tiah CACC Nunphung le Aw-mui Department Secretary Rev. Dr. Khar Ling nih The Hakha Post ah a chim.
Hi lemcang muicawl thlak khawh nakding ah tuanbia (Script) tialtu dingah Aidi (Anna Biak Tha Mawi) le Pa Pui (The Hakha Post) tuanvo pek an si. Hi bantuk lemcang thlaknak kong he pehtlai in Aidi hi thlak ding mi tuanbia (script) tial ningcang cawnnak sianginn ah tha tein a cawng mi a si.
Hi lemcang thlaknak ca ah CACC nih a tlawm bik tangka Kyats sing 150 tal suaipiak khawh ding in a ra lai mi April CACC BM ah chuahpi ding in timh a si. Tutan hi CACC nih lemcang a voi thumnak a thlak ding mi a si. A voi khatnak cu 1993 ah Duh Mang le Dar Din tuanbia an thlak i a voi hnihnak cu 2016 ah Hling Lak En Par an thlak.
