CACC Nunphung le Aw-mui Department tawlrelnak in Phete le Pu Vom tuanphung muitawn muicawl (cartoon film) an chuah lai tiah tuanvo ngeitu sin in thawng kan theih.
“CACC cu kan nunphung le kan caholh kilvengtu ding kan si bantuk in kan caholh le nunphung kilvennak ah a tha ngai mi cu ngakchia mino nih an duh ngai mi muitawn in muicawl tampi chuah khawh hi a si. Cucaah Chinmi nih tuanphung kan ngeih mi Phete le Pu Vom tuanbia kha a hmasa ah kan chuah lai i a hnu ah kan tuanphung dang pawl kan chuah lai,” tiah CACC GS Rev. Dr. Za That nih July 2 ah a chim.
Computer in muitawn muicawl tuah hi a har ngaingai mi a si. A muitawn suai hmasa hnu ah cawlter le holhter a si. “Tutan kan tuah ding hi Australia in muitawn lemsuaithiam Kyaw Kyaw @ Ram Cung nih muitawn a suai lai i Rev. Cung Hnin nih a aw le cawlcanghter ti in an i bawm lai i an kan tuahpiak lai. Anmah pahnih hi bawmh kan hal hna i September thla thar in Hakha CACC zung ah an rak kan tuahpi lai,” tiah Rev. Dr. Za That nih a chim.
Hi a voi khatnak muitawn tuah ding mi ah “Phete” ti mi hi zawng maw a si saveh, zei in dah kan suai lai? mei a ngei lai maw? ti mi kong ah muitawn lemsuaitu ding Kyaw Kyaw nih a fian lo ca ah CACC Nunphung le Aw-mui Department nih upa an auh hna i a tam deuh nih “Phete ti mi cu saveh in an hman ca ah Phete ti mi lemcangtu cu saveh mui in suai siseh,” tiah CACC Nunphung le Aw-mui lei Department nih an fehter. A tuanphung le hi rian tlamtlin nakding cu CACC Nunphung le Aw-mui lei Department Secretary Rev. Dr. Khar Ling hruainak in tawlrel a si lai.
