Chin Association for Christian Communication (CACC) General Secretary hlun a si mi Rev. David Shwe (Kum 76) cu US ram, Indianapolis ah September 27 ah mual a liam tiah kan theih.
“CACC ah General Secretary rian a ṭuan mi hna lakah Bawipa Pathian sinah aa din hmasa bik mi a si i a ṭuanhawi vialte le CACC ramchung zumtu dihlak cu zuunngaih fakpi kan tuar ve; asinain CACC nih tlaihtleng ah aa chiah mi ‘Thih tiang zumh awktlak salṭha’ (Bia 2:10) sinak cu a nunnak nih tehte a khaan cang,” tiah CACC nih ngaihchiatpinak cathanh a chuah.
Rev. David Shwe cu Hakha Baptist Church (HBC) zong ah Senior Pastor a rak ṭuan. CACC ah Literature Department Secretary a ṭuan hnu ah General Secretary rian tiang a rak tlai mi a si.
Lai Baibal Thiang tampi chuah khawhnak caah hawikomh a thiam i mizapi he riantuanti a thiam mi, a dam mi pehtlaihnak a rak kan serpiaktu kan pa a si, ti zong CACC ca chuah mi ah an ṭial.
“Pathian salṭha, zohchunh tlak hruaitu kan pa a si. Harnak phunkip le caan har lio ah miphun le Pathian pennak ca ah pumpek in rian a ṭuantu, roṭha a kan chiahpiaktu kan pa a si,” ti zong CACC nih a langhter.
Rev. David Shwe a hmanung bik upatpek caanhmannak le ruakvuinak cu nihin September 30 ah an tuah lai tiah kan theih.
Hmanthlak: ICBC
