Caan thumnak Chin Ramkulh Hluttaw tuahkel meeting cu a ra lai ding 2021 February 9 ah an tuah lai tiah Chin Ramkulh Hluttaw Speaker le NLD Chairman Pu Zo Bawi sin in thawng kan theih.
Atu tuah an timh mi Chin Ramkulh Hluttaw tuahkel meeting a caan thumnak ahhin 2020 kum thimnak lio i teinak a hmu mi Hluttaw Palai dihlak hna nih Bible tlaih in biakam chiatserh, Chin Ramkulh Hluttaw Speaker thimnak le Hluttaw Speaker changtu thimnak an ngei lai tiah theih a si.
“February 9 i meeting tuah ding hi a fawinak in chim ahcun Chin Ramkulh Hluttaw thar aa thok a si. Hi meeting ahhin a bik in Hluttaw Speaker le a changtu thimnak a um lai. Cun, 2020 kum thimnak ah teinak a hmu mi Hluttaw Palai dihlak Bible tlaih in biakam chiatserhnak zong an ngei lai. Ni zeizat chung dah kan tuah lai ti zong aa fiang rih lo. Caan nih a kalpi ning in a si te ko lai. Cun, kan tuah ding zong hi, hi bantuk theng, cu bantuk theng ti tutiang cu a um rih lo. Central lei nih thawng an kan thanh mi kan hngak ko,” tiah Pu Zo Bawi nih The Hakha Post ah a chim.
Caan thumnak Chin Ramkulh Hluttaw ahhin mizapi nih thimmi Hluttaw Palai minung 18 le ralkap lei in minung 6 (zatuak 25%) an dihlak minung 24 an si lai. 2020 kum Myanmar ram party tling democracy thimnak ah Hluttaw Palai teinak a hmu mi hi NLD party nih hmun tamcem ah teinak an hmuh.
Caan thumnak Chin Ramkulh Hluttaw thar ahhin party lei in Hluttaw Palai, NLD in minung 16, CNLD in minung pakhat le ZCD in minung pakhat an i tel lai.
