Hakha-Thantlang karlak i abiapi ngaimi C3 sakhaan cu SAC ralkap nih an laak ṭhan, tiah thawngpang a leng ngai nain cu thawngpang cu a dik lo tiah ṭuanvo ngeitu nih a chim.
CNF CEC chungtel Pu Khua Uk Lian nih, “Nizaan kha C3 kha vanlawng in an ṭhuat tuk tik ah kan fale kha tlawmpalte hnu ah an van i thawn. Sihmanhsehlaw, ral pawl rak kai kho hna hlah seh tiin a leng in an orh peng hna. SAC ralkap cu an hnu ah an i thawn ṭhan i kanmah nih hmunhma kan laak ṭhan ko,” tiah nihin August 8 zinglei Vanrawng Zuunthil biaruahnak ah a chim.
C3 tlang cu kan ral pawl kut ah a phan tiin thawngpang diklo an ṭialmi pawl hi ramchung le ramleng kan unau zong nih i zumh lo ding in a chim chap.
Thantlang khuachung i SAC ralkap an i dupnak hmun 5 chung ah hmun khat cu an chuahtak cang, tiah Pu Khua Uk Lian nih Thantlang khuachung sining zong a chim.
