Hakha Peng, Bungzung ah mirang vawlei chuahnak tender cu Pyidaungsu level in tender sokter an si i tender a hmu mi company nih Pyidaungsu Cozah ah ngunkhuai a pek ding mi a pek khawh rih lo ca ah hnon than a si.
“Tender a hmu mi Company hi sui a chuah mi a si i Pyidaungsu Cozah ah ngunkhuai a pek ding mi a um. Cu ngungkhuai cu a pe dih rih lo. Pyidaungsu Cozah ah ngungkhuai pek ding leiba a ngei mi kha cu rian kan pe kho lo, tiin Myanmar ram Leitang Thilchuak Kilvennak lei Pyidaungsu Minister zung nih an dodal ca ah hnon than a si,” tiah Chin Ramkulh Cozah Chimphuannak Nawlngeitu Minister U Soe Htet nih The Hakha Post ah a chim.
Bungzung mirang vawlei chuahnak tuah ding mi hi hmun hnih a si i mirang vawlei tampi in a chuah kho ding hmun a si, tiah thiamsang pawl nih zohfel hnu ah fehter mi a si cang. Rian thawk nakding ah Pyidaungsu Cozah nih tender a auh i tender a hmu mi company zong a um cang nain ngunkhuai leiba ruang ah hnon than a si, tiah kan theih.
“A voi khatnak tender auh mi cu a tlam a tling ti lo. Atu hi mirang vawlei chuahnak a tuantu ding company thar zong kan thim kho rih lo. Kan tawlrel ko lai,” tiah Minister U Soe Htet nih a chimchap.
Theihternak le ralrin peknak: The Hakha Post hnatlaknak tel lo in thawngpang i tlen le hmanpiak kan siang lo.
