Chin Ramkulh Paletwa peng Pui Vum khua pawng ah AA le Cozah ralkap kahdohnak 2020 March 4 zaanlei sang ah fak ngai in an i kap i inn thum a kang, minung pakhat an thi tiah kan theih.
Hi kong he pehtlai in Paletwa khua mi (Min langh ter duh lo) nih, “Tuzaan lei ah fak ngai in an i kap. Hi an kahnak ah khua mi pakhat kum 30 upa a thi, inn thum a kang. Pui Vum khua le Likkung khua mi a inn in inn 25 khua chung ah um ngam lo in an zaam,” tiah The Hakha Post ah a chim.
Hi kahdohnak ah taang 8 a cawng lio mi kum 13 ngakchia Ko Zaw Naing le kum 26 upa ngakchia pahnih i nu Daw Win Phyo hna cu an ke le an tai fak ngai in hliam an tuar ca ah sii-inn ah han um tiah khua mi sin in kan theih.
Cun, “Hliam a tuar mi hi an hma a fak ngai. Tilong le motor lam an phih ca ah sii-inn ah kan kal pi kho hna lo i thinphang ngai a si. Ral tuknak vanlong in suimilaam 6:00 pm hrawng ah an i kap,” tiah min langh ter duh lo mi nih a chim chap.
