Kanpetlet peng B.E.H.S. sianginn he pe 600 a hlatnak hmun a um mi inn, zinglei suimilaam 11:30 ah inn hnih a kaang tiah Kanpetlet meithat zung in kan theih.
Hi kong he pehtlai in Kanpetlet Meithat zung lutlai pakhat nih, “A kaang mi hi inn hnih a si i, inn khat hi an sak lio mi a si. Cun, kangh hram aa thok ning hi an sak lio mi inn i mei hri an sih mi a kanghnak in aa thoknak a si. Hi inn kanghnak ruang ah hliam a tuar mi cu an um lo nain a inn tu hi cu a ciam dih. Inn a kaang ti thawng kan theih lecangka in kan va fuhcolh. Kan si khawh chung in mei kan phalh nain inn hnih cu kan phal kho lo. Inn khat hi an sak lio mi a si i, inn khat tu hi cu an sak dihkate a si. A kangh ah hin inn satu an um nain an thei lo i a si lai ,” tiah The Hakha Post ah a chim.
Inn a kaang mi hi Kanpetlet Baptist Khrihfabu Pastor Mana Heh le Saya Mana Ling hna i an inn a si. Pastor Mana Heh inn hi an sak cuahmah mi a si tiah kan theih.
