Nihin zinglei ah bomb puah sualnak ruang i hma a pu mi Chinland Defense Force-Thantlang battalion-4 (Zahnak tlang CDF) ralkap pali le khuami pakhat hna chung in CDF ralkap pahnih an nunnak a liam tiah kan theih.
“Nihin bomb in aa hliam mi Zahnak tlang CDF pawl kha Sii-inn ah an kalpi hna. Sii-inn phanh manh lo in lampi ah pahnih an nunnak a liam,” tiah Lungler khuami pakhat nih THP ah a chim.
Hma apu mi hna cu Commander-2 Salai Joel Thang (Sihhmuh), Salai Lal Pek Lian (Lungler), Salai Tum Bawi Tling (Lungler), Salai Biak Tha Peng (Zaangtlang) le Ruakhua khuami Bawi Kulh a si tiah kan theih.
Hma a pu mi panga chung ah pahnih an nunnak a liam. A nunnak a liam mi pahnih cu; a kut ah hma a pu mi Zaangtlang khuami Salai Biak Tha Peng le a paw ah hma a pu mi Lungler khuami Salai Tum Bawi Tling an si tiah kan theih.
“A nunnak a liam mi pahnih ruak cu kirpi an si. A dang hma a pu mi hna cu Sii-inn ah an lanhpi hna,” tiah a cunglei langhter mi Lungler khuami nih a chimchap.
Photo: Ram le miphun ca ah a nunnak a pe mi Salai Biak Tha Peng le Salai Tum Bawi Tling
