Mon ramkulh, Bilin peng ah council ralhraang motor 10 cu KNLA, PDF phukomh nih an kah hna ca ah council ralhraang lei Lieutenant Colonel pakhat tel in 9 a hmun ah an thi tiah kan theih.
Nihin chun suimilaam 12:00 ah Mon ramkulh, Bilin peng Sipin gate chuah, Naungyo ah ralhraang motor tlar cu bomb an puah hna i motor pakhat cu bomb nih a khen ca ah a rawk dih. Cu ralhraang motor tlar cu Bago ramthen, Kyaukgyi lei panh in a kal mi an si nain bomb puah ruang thi le hliam an tam ca ah Kyaikto ralhraang umhmun ah an lut. A thi mi le hliam a tuar mi hna cu an i phorh hna i, an i tinhnak lei kal cu an i let than tiah kan theih.
“Bilin ah nihin chun suimilaam 11:57 ah sipin gate lonh, Naungyo ah ralhraang motor bomb an puah hna i motor pakhat cu a rawk dih. Lieutenant Colonel pakhat tel in ralhraang 9 an thi. Panga nih hliamhma faak an tuar, an thih lai zumh a si. Motor 10 ah pakhat cu a rawk dih. Hmai an kal khawh ti lo caah Kyaikto ralhraang umhmun ah an lut” tiah KNLA, PDF phukomh lei thawnghram in kan theih.
Ref: Khit Thit Media
