Nihin February 27 ah SAC ralkap nih Kalay khuachung ah tualchungmi pahnih meithal in an kah hna i cu chung ah Pu Lal Eng Liana (kum 52) zong aa tel, taih chungkhar nih an chim.
Pu Lal Eng Liana hi Kawlkulh khua in biakinn rianherh ah Kalaymyo ah a kal ta mi a si i, SAC ralkap nih Buda Lamṭhen pawng ah meithal in an kah caah a nunnak a liam.
“Buda Lamṭhen phak lai ah SAC ralkap pawl nih meithal an puah. Ka pa hi a thi colh lo. Cycle in a kal i Sanmyo pawng ah a tlu i a nunnak a liam. Pawngkam mino pawl nih ka pale zung ah phone an chawnh i atu cu a ruak kan inn ah a phan cang,” tiah a fapa nih Khonumthung ah a chim.
Bochoh lamkam ah a dir mi pa pakhat zong SAC ralkap nih motor cung in meithal in an kah caah a nunnak a liam ve tiah ti a si i, ahodah a si ti mi bel fiang in theih a si rih lo.
Nizaan Fenruary 26 ah a cang mi Kalay University le a kiangkap kahdohnak lio zong ah khan kum 40 hrawng a si mi tualchungmi pa pakhat cu SAC ralkap nih meithal in an kah caah a nunnak a liam ve.
Kalay khuachung ah SAC ralkap pawl motor in i chokvak in meithal kah thlorh in an kah caah mipi lengchuah an tih cio i, nihin cu Kalay khuachung zong a king ngaingai, tiah tualchungmi hna nih an chim.
