Falam khuachung le a kiangkap khuate ah a um mi hna nih a fiang lo mi bia vaivuan ruang ah khua zaamtak lo ding in Falam zatlang bu “Falam Pawlpi” nih forhfialnak a tuah.
Nizaan May 31 ah khan Falam Pawlpi hruainak in Falam le a kiangkap khuate in khuanu khuapa minung 70 hrawng ton biaruahnak an ngeih hnu ah atu bantuk hin khua zaamtak lo ding in forhfialnak ca an chauh hi a si.
Cu ton biaruahnak ah cun “Bai vaivuan ruang ah Falam le a kiangkap khua ah a um mi hna nih ralzaam lo ding le mahle inn cio ah hnangam te in um ding” in lungtlinnak an ngei.
Falam khuachung ah poipang ton sual ahcun a tawlreltu ding ah volunteer riantuantu minung 20 zong Falam Pawlpi nih a thim hna.
Falam khua ah kahdohnak a chuak lai ti mi thawngpang a len pah lengmang caah Falam Pawlpi hruainak in atu bantuk hin ton biaruahnak le mizapi sin forhfialnak ca an chauh hi a si, tiah thawng kan theih.
