Believers Church, Myanmar nih Gospel for Myanmar min in Rakhine Ramkulh le Chin Ramkulh Paletwa ah Mission riantuantu (Missionaries) hna ca ah tangka fang Ks. 15,750, 000 in facang an bawmh hna, tiah tuanvo ngeitu sin in June 5 ah kan theih.
Hi bawmhnak hi Rakhine ram ah Believers Church nih Missionaries a thlah mi hna ca ah facang tun 269 (Ks. 9,415,000 man), Khrihfabu dang le private Missionaries hna ca ah facang tun 181 (Ks. 6,335,000 man) an pek hna.
“Facang cu cawk a si rih lo nain tangka cu June 5 ah kan kuat cang hna. Kan bawmh ding mi hna hi, Ann khua um mi, Minbya um mi, Kyaukdaw ah a um mi, Paletwa ah a um mi le Sami ah a um mi Mission riantuantu an si lai. Hi bantuk in kan tikhawhtawk pekchanh khawhnak a kan petu Pathian cung ah kan i lawm. Gospel for Myanmar Program ca ah Believers Church Myanmar he kuttlai in rian a tuantu WUPM, Metropolitan le kan hruaitu Bishop CK No Chhum cung ah kan i lawm. Rakhine lei kan hruaitu Bishop Dr. Tial Hmung nih meeting a kan telpi ca ah a tlam a tling khun,” tiah Believers Church General Secretary Rev. NC Thawng Tha Thang nih The Hakha Post ah a chim.
Believers Church hruainak tang ah Chinland FC nih Chinland for Tedim tiin bawmhnak an rak pek bal cang. Cun, atu hi Chinland for Paletwa tiin bawmhnak pek than zong an i tim i, cun, atu bantuk ralram a si mi hmun ah Khrihfabu member cio zong bawmhnak pek rih ding in timhtuahnak an ngei, tiah kan theih
Photo/Rev. NC Thawng Tha Thang
