CDF-Thantlang nih a voi 11nak Basic Military Training tuah ding in timhtuahnak a ngeih caah training kai a duh mi kum 18 cung pohpoh i tel ve ding in February 24 ah sawmnak a tuah.
“Ralhrang uknak a hram bongh khawh nakding, Chin miphun nih mahte khuakhan lairelnak kan hmuh khawh nakding le Federal Democracy ramkomh kan ser khawh nakding ah tel ve a duh mi ca ah Basic Military Training kan tuah lai,” tiah CDF-Thantlang nih a langhter.
A voi 11nak Basic Military Training ah i tel ding in CDF-Thantlang sin ah a hlathlai mi micheukhat zong an um cang, tiah CDF-Thantlang tuanvo ngeitu pakhat nih Khonumthung ah a chim.
Basic Military Training a kai ding mi hna cu kum 18 cung an si lai, a ngandam mi a si lai, ralkap zulhphung a zul kho ding mi a si lai, CDF-Thantlang ah a tlawm bik kum 1 aa pumpe kho ding mi a si lai i, rian khinhnak hmun poh ah a kal kho ding mi a si lai tiah an langhter.
Miphun, biaknak, nu le pa le pengtlang thleidannak um lo in ahopoh hi Basic Military Training ah hin kai khawh a si, tiah CDF-Thantlang nih sawmnak a tuah.
CDF-Thantlang nih Basic Military Training hi voi 10 tiang a tuah cang pin ah Refresher Training zong voi 6 a tuah cang, tiah theih a si.
