Myanmar-Bangladesh ramri, Rakhine ramchung kahdohnak ruang ah Bangladesh ram lei ah a zaam mi SAC ralkap 260 leng an phan, tiah Bangladesh thawngzamhnak Dhaka Tribune nih a ṭial.
AA le SAC ralkap karlak kadohnak ruang ah February 4 thawk in SAC ralkap pawl cu Bangladesh ram lei ah zaam hram an rak thawk.
Nihin February 6 zinglei tiang ah SAC ralkap 229 hi Bangladesh ram ah an rak phan i, chunhnu ah a dang SAC ralkap 35 an phan chap, tiah Dhaka Tribune nih a langhter.
Bangladesh ah a zaam mi hna chung ah hin SAC kut tang ah rian a ṭuan mi Immigration (La-Wa-Ka) rianṭuan pawl an i tel, tiah a langhter.
Bangladesh ah a zaam mi SAC ralkap pawl nih Bangladesh ramri congtu ralkap sin ah an hriam an chiah hna i sianginn le Hall tibantuk ah an umter chung hna.
Nizan February 5 ah khan Myanmar lei in an kah mi hriampi pahnih cu Bangladesh ramchung ah a tlak caah minung pahnih an nunnak a liam, tiah Bangladesh ramchung thawngzamhnak pawl nih an langhter.
