AA nih a kah hna ruang ah Bangladesh ram ah a zaam mi SAC ralkap 123 cu Bangladesh Cozah nih nihin ah Myanmar ram ah a rak kuat hna i, SAC zong nih Myanmar ram ah thong a tla mi Bangladesh rammi 85 a chuah ve hna tiah theih a si.
Myanmar ram hmun kip ah thong a tla mi Bangladesh rammi 85 cu nihin ah an ram an phan lai i, Rakhine in Bangladesh ah a zaam mi ramri hnak palek le ralkap 123 zong Myanmar lei ah kuat an si lai tiah Bangladesh media pawl cherhchan in Khit Thit Media nih a langhter.
Bangladesh ram, Cox’s Bazar Deputy Commissioner Mohammad Salahuddin nih, “Myanmar thonginn pawl ah thong a tla mi Bangladesh rammi 85 cu Bangladesh ah an rak kir lai. Bangladesh ram ah a rak zaam mi Myanmar ramri hnak palek 115 le ralkap 8, an dihlak minung 123 zong Myanmar ram lei ah kan kuat hna lai,” tiah a fehter.
Ram hnih kar minung i kuatnak cu Ramdang lei Minister Zung i ceihmainak in tuah mi a si i, hi hlan zong ah minung i thlennak voi tampi an tuah cang tiah theih a si.
Tu kum Februay 15 ah Rakhine in Bangladesh ah a zaam mi SAC ralkap 330, April 25 ah SAC ralkap 288 le June 8 ah SAC ralkap 134 hna cu Bangladesh Cozah nih Myanmar ram lei ah an rak kuat cang hna tiah theih a si.
Photo: Bangladesh ram ah a zaam mi SAC ramri hngak palek le ralkap pawl hmanthlak hlun a si.
