Kachin ramkulh, Bamaw khuapi laak kahdohnak ah KIA nih SAC ralkap i raldohnak Armour Vehicle (Tank) pali an laak, tiah theih a si.
Nihin January 24 zinglei sml. 6:00 ah Bamaw khua i SAC ralkap hmunkhuarnak pawl cu KIA nih an tuk ṭhan hna i, Bamaw vanlawng bual pawng i SAC Tank ralkap bu sakhaan le Tank pali an laak pin ah SAC ralbawi pakhat zong a nung in an tlaih, tiah Kachin thawngzamhnak KNG nih a langhter.
“Nihin zinglei ah KIA nih Bamaw khua i SAC ralkap sakhaan pawl an tuk ṭhan. SAC ralkap Battalion No. 47, Sah-Kah-Khah No. 21 le Bamaw University i SAC ralkap pawl an tuk hna. SAC Tank ralkap hmunkhuarnak cu an laak cang,” tiah thawngpang hram minung pakhat nih KNG ah a chim.
Aluancia zarh hnih hrawng in khan KIA ralkap pawl nih Bamaw khua i SAC ralkap hmunkhuarnak pawl an kulh i nihin ah doh hram an thawk hi a si.
SAC Tank ralkap bu hmunkhuarnak cu an laak cang i, hmun dangdang zong ah pehtlai in kahdohnak a faak rih, tiah theih a si.
