Ayeyarwaddy Ramthen, Wakema Peng NLD chungtel le riantuantu minung 21 a ruang um loin Lutlai nih an rian in dinhter dih an si tiah Wakema Peng NLD lutlai U Aung Kway sin in kan theih.
Atu bantuk in rian phuahternak hi Pengkomh NLD Lutlai chimnak in kan theih mi a si tiah U Aung Kway nih a chimchap.
“Party Center lei nih rian dinhternak ca an kan pek mi cu nihin tiang kan dong rih lo. Pengkomh Party Lutlai nih an kan chimh mi lawng kan theih rih. Zeiruang ah dah atu bantuk in thil an tuah ti zong kan thei kho ve rih lo. Atu bantuk i an thil tuah hi thimnak lai zong a si i, zoh a chia ngai. Cun teinak hmuh nakding zong ah dawnkhantu a si te lai,” tiah U Aung Kway nih The Hakha Post a chim.
Atu bantuk in rian dinhter le phuah an si ko nain Wakema NLD party lutlai hna cu tanlak an i tim tiah thawng kan theih.
“Thilsual kan tuahmi zong a um lo, party phung kan buar mi zong a um lo. Ca an chuah mi le nawl an chuah mi, phung an ser mi zong kan zulh dih ko. Nihin tiang kan i fiang bak lo,” tiah Wakema Peng Party chungtel U Taung Myint nih a chimchap.
Chin National League for Democracy Party chung in Thantlang Peng, CNLD party Lutlai pahnih hna zong July 11 ah rian in an dinhter hna tiah thawng kan theih.
Photo/ ONM
