Australia Melbourne um Olivia Nu Cinzah nih AA hriamtlai le Cozah ralkap i kah ruang ah Paletwa raalzaam ca ah Australia um Laitlai sin ah bawmhnak a kawlpiak mi Kyats sing zakhat cu May 5 ah tuanvo ngeitu sin ah a kuat cang tiah kan theih.
“Bawmhnak hi Kyat sing zakhat ka kuat hna. Bawmhhalnak hi ngol lo in peh than hau in ka ruah ca ah Dollar in zakhat le kul a hi ka chiah rih. Sing zakhat hi Chin IDP Support Committee tuanvo ngeitu Saya Kyaw Aung sin ah ka kuat i tlamtling tein kan hmuh tiah thawng a van ka thanh,” tiah Olivia Nu Cinzah nih The Hakha Post ah a chim.
Olivianu Cinzah nih hi bawmhnak amah pumpak in a tawlrelnak kong he pehtlai in “Kan unau Paletwa raalzaam pawl an temtuar ning facebook in an van thlah mi ka hmuh tik ah ka lung a tha lo tuk. Cun an sining a theitu kan nau Salai Tluangte zong nih ‘Olivia nu, rak kan bawm ko, zaangfak tuk an si,” tiah a van ka ti lengmang ca ah le pumpak zong a bu zong in a tawlreltu an rak um lo ca ah keimah pumpak in ka tuah mi a si,” tiah The Hakha Post ah a chim.
“Bawmhnak ka halnak le a petu hna hi Australia um Hakha Thantlang mi an si. Ka kuat tiang ah minung 218 nih an pek i petu vialte cung ah kan i lawmtuk,” tiah a chim.
A petu hna nih Paletwa raalzaam cung ah zaangfahnak an ngeihning he pehtlai in: “Bawmhhalnak hi voi dang zong ah ka tuah bal nain tutan hi tambik a chuak. Hika ramleng ah a thang mi mino ko hi an i pe. Cun Students Visa in rian a tuan mi hmanh nih an pek. Cun bawmhnak hi Melbourne nitlaklei um Chinland Club le Australia Chin Community Secretary Pu Sang Hre amah pumpak zong nih kawlpiak cio a si. A cheu cu kap hnih zong ah a pe mi an um. Kan nau nu Parku hna cu a ni khat hlawh nih a tlinh lo nain ‘facebook ah nu le ngakchia hliam a tuar mi ka hmuh hna ah ka celh lo’ a ti i a ngeihchunte a rak pek,” tiah tawlreltu nih a chim.
Olivia Nu Cinzah hi Australia ah a chungkhar he khuasa mi an si. Khua le ram zawnruahnak thinlung a ngei ngaingai mi a si. Cu hlan zong ah bawmh herh mi tiah a ruah mi: An hawikom Salai Tawk Al (Daidin) a thih bulhnak, CNF nu le ngakchia hna bawmhchanhnak, Australia ah a nu nih a thihtak mi ngakchia Victor ca ah, cun Thantlang innkaang ca ah, Hakha ah COVID-19 mizaw hmuh hmasa mi nu hna ca zong ah bawmhnak hi amah pumpak in a rak kawlpiak bal mi a si.
Nihin tiang ah vawlei cung Chinmi pumpak in Paletwa raalzaam ca ah bawmhnak a kawl mi le a chuahpitu lakah tambik a kawlpiak khotu a si.
Hakha ah a hmasabik COVID-19 mizaw an hmuh mi kum 18 nu ca ah a kawlpiak mi Kyats sing khat le thongkul zong May 5 ah chungkhar sin ah a kuat i an hmuh cang tiah amah sin in thawng kan theih.
Photo/The Hakha Post
