Australia ram meih kangh ruang i harnak a tong mi hna ca ah Esther le Benjamin concert an tuah lai
Australia Chin Community hruainak in Australia ram mei kangh ruang i inn le lo chuah tak in harnak a tong mi hna ca ah Esther Dawt Chin Sung le Benjamin Sum nih March 13 Melbourne ah concert an tuah lai tiah kan theih.
“2020 March 9 ah Yangon in kan i thawh lai. Kei tu hi cu concert a dih thaizing in ka kir colh lai. Atu bantuk in harnak a tong mi hna ca ah bawmhnak va pek khawh le va tawlrel piak khawh ding dirhmun ah ka van dir ca ah ka nun di a riam kho taktak. An kan sawm tu hi Australia ram um kanmah Chin Community nih a kan sawm. Chin Community nih an chim ning ah cun concert kan tuah lai i, kan hmuh mi tangka le hlan i bawmhnak an rak kawl cia mi tangka he fonh in Australia cozah pi sin ah kan pek lai tiah an kan ti. Hi kan concert a tlam a tlin khawhnak ding thlacamnak zong in rak kan bawm ve uh,” tiah Myanmar Idol Season 4 1st Runner Up Salai Benjamin Sum nih The Hakha Post ah a chim.
Australia ram mei kangh hi 2019 November 19 in aa thok. A inn in a kangh chih mi hi inn 50 leng a si i, Koalas timi saram 2000 an thi. A liamcia kum 2009 kum zong ah fak taktak in ram mei a rak kang bal cang i, minung 173 an thi cang
Cun, “ Atu an Visa hi one plus a si i, ka fanu hi Visa ka hmuh khawh a si cun keimah nih ka va zulh lai. Atu bantuk in bawmhnak pe kho ding in an sawm tik ah kanmah zong kan i lawm i kan fanu zong aa lawm tuk ve lai tiah ka ruah. Australia ah visa an kan pek ning in kan va um zong a si kho. Tuan ah kan rak kir than zong a si kho,” tiah Myanmar Idol Season 4 Winner Esther Dawt Chin Sung a pa nih The Hakha Post ah a chim.
