Karenni ram hmun kip ah a cang mi August thlachung kahdohnak ah SAC ralhraang lei ralbawi tel in 110 an thi, a nung in 3 kan tlaih hna, hriamngan zun 1, meithal zun 15 tel in hriamnam tampi kan laak khawh tiah KNDF Centre nih a thanh.
August thlachung ahhin i kahnak voi 50 hrawng a chuak, SAC ralhraang lei in 110 an thi, 40 leng nih hliam an tuar, a nung in 3 tlaih an si. KNDF in minung 5 nih ram ca ah an nunnak an pek tiah theih a si.
August 2 thawk in Demoso-Hpruso lampi tlai dingin Demoso peng le Hpruso peng kar lam cung ah SAC ralhraang No. 55 Battalion nih raallam hmun thum in an sial i, Ngwetaung, Kadarlar, Hteethawhku le Dawngehku khua hna ah hmun an khuar caah Karenni ralkap phu komh hna he ni fatin kahdohnak a chuak.
August thlachung ah SAC ralhraang nih vanlawng in kahdohnak voi 45 a tuah i rammi pakhat nunnak a liam. SAC nih hriamngan a kah mi ruangah rammi 2 an nunnak liam, Drone in bomb a thlak ruang ah ngakchia 3 hliam an tuar, vanlawng in bomb a thlak ruang le hriamngan kahnak ruangah inn 20, Khrihfa biakinn 1, sianginn 2 an rawk. SAC ralhraang nih khuami inn 18 an duah piak hna tiah an langhter.
Photo: KNDF
