April thla chung Mindat peng le a kiangkap i SAC ralhraang he kahdohnak ah ralhraang 26 nak tlawm lo an thi i, SAC nih vanlawng in kahdohnak voi 19 a tuah tiah CDF-Mindat nih a thanh.
SAC nih vanlawng in bomb a thlak ruang ah rammi pathum an thi i pakua hma an pu tiah an langhter.
April thla chung ah SAC ralhraang le CDF-Mindat cu Pengthen-2 chung, Mindat-Matupi lam meng 9, Mindat Kyaukhtu lam, Mindat khua pawng meng 4 le Kanpetlet lampial ah kan i kap i tualchung CDF le PDF pawl he an i bawmh caan zong a um.
April 7, MIndat pengthen No. 2 ah CDF-Mindat le Yaw PDF i bawm in SAC he an i kap. Cuka ahcun SAC ralkap 15 an thi. April 9, Matupi-Mindat lam meng kua zawn kahdohnak ah ralhraang pahnih an thi. April 23, Mindat-Kyaukhtu lam kahdohnak ah SAC lei in pasarih nak tlawm lo an thi i hriamnam zeimaw zat zong an laak khawh.
April 24, Mindat khua pawng meng li a hlatnak hmun kahdohnak ah SAC ralhraang pahnih an thi. April 26 zinglei, Kanpetlet lampial kahdohnak zong ah ralhraang pakhat hma a pu tiah an langhter.
SAC nih Mindat peng chung ah vanlawng in kahdohnak voi 19 a tuah i rammi pathum an thi, pakua hma an pu tiah CDF-Mindat nih cathanh an chuah.
Photo : CDF-Mindat (Hmanthlak hlun a si.)
