Chin Ramkulh Cozah nih nawl a chuah bantuk in April 27, zaanlei suimilaam 3:00 tiang ah nawl ngai lo mi, a vaak sawhsawh mi minung 22 cu taza an cuai hna, tiah tuanvo ngeitu sin in kan theih.
“Zaanlei suimilaam 6:00 tiang kan zohfel rih lai. Atu zaanlei suimilaam 3:00 tiang ah nawl ngai lo mi hi minung 22 kan tlaih hna. Biaceih Zung nih bia a ceih hna lai i, tangka an liamter hna lai,” tiah Hakha Sii-inn-uk Dr. Mang Biak Kung nih The Hakha Post ah a chim.
Hi kong ah Minister Pu Sui Thio nih, “Zuri sabah zong an um. Motorcycle luchin an i chinh lo. Hmurhuh an i huh lo. A neemnak tein kan chimh hna nain a ngai lo mi cu Biaceih Zung nih bia a ceih lai hna lai. Hi renghtlaihnak phung hi zeirel loin um ding a si lo. Mizapi kan him nakding a si. A herh bak lo mi ah a vaak sawhsawh mi kan um peng rih. Mah innte ah um hi himnak a si ko. Vah duh tuk ding a si lo. Motorcycle luchin chinh le hmurhuh i hup lo bak in kan vaak rih. Cu bantuk cu kan tlaih peng ko hna lai,” tiah The Hakha Post ah a chim.
Hakha khualak lawng si loin hauka kip ah chekhlatnak zong rengh deuh an timh i, khualak vaak mi zong biatak tein an rengh thluahmah rih lai, tiah kan theih.
