April 27 zaan thok in Hakhathar hauka ah Khuabawi le Mino i bawm in mi lutchuak cheknak le renghnak an thok cang lai
Kalay-Falam-Hakha le Tiphul lei tiang in Hakhathar ah a luut mi pohpoh April 27 zaan thok in zaan fatin cheknak an tuah cang lai, tiah April 26 ah Hakhathar Khuabawi sin in kan theih.
“Atulio zawtnak in kan him nakhnga, mino hruaitu he tonnak kan ngei i zaan fatin mi lutchuak cheknak le renghnak cu April 27 zaan in zaan fatin kan chek cang lai. Cozah nihcun, zinglei suimilaam 6:00 in zaanlei suimilaam 6:00 tiang an chek. Zaanlei 6:00 hnu pohpoh Hakhathar mino hna nih biatak tein an chek cang lai. A ruang cu zaanlai ah thli in a lutchuak mi an um pah lengmang, tiah thawng kan theih i kan him nakhnga tawlrel kan timh. Motor le motorcycle in a lutchuak mi pohpoh kha kan chek hna lai. An min, hmatpungtin, motor le motorcycle number, driving licence tiang in kan chek hna lai. Lunghrinh mi an um sual ahcun Ngandamnak Zung maw asiloah Cozah tuanvo ngeitu maw, pakhatkhat sin ah thawng kan thanh colh lai,” tiah Hakhathar Khuabawi Pu Tawk Lian nih The Hakha Post ah a chim.
Hakha hauka kip ah mi lutchuak an chek nain zaanlei suimilaam 6:00 tiang lawng an chek i a thli in zaanlai ah a lutchuak mi an um lengmang ca ah, atu bantuk in Hakhathar Khuabawi le Mino hna i bawm in biatak tein rengh le fel tein cheknak an tuah cang lai, tiah kan theih.
