April 27 (cawnnikhat ni) thok in Hakha khuachung ah a konglam um loin a vaak sawhsawh mi, aa chok men mi pohpoh tlaih in thongthlak an si cang lai, tiah Chin Ramkulh Cozah Lamsuul le Pehtlaihnak Minister Pu Sui Thio nih April 23, zaanlei suimilaam 6:00 ah a chim.
Hi phung zulh ding hi Chin Ramkulh Cozah nih April 17, cathanh No. 26/2020, upadi caangthen 4 (c ) ning bantuk in bia a chah mi a si cang nain pehzulh a si rih lo i a ralai mi April 27 cun biatak tein an tawlrel cang lai, tiah kan theih.
“Mah innte ah um a tha bik. A herh lo ah lengchuah, vah, khualak ah motor le motorcycle rang taktak in khalh i a vaak mi pawl, a konglam um loin a vaak mi cu tlaih in thongthlak an si cang lai. Poipang ton le damlo tik zong ah sii-inn le siikhaan kal tik ah minung 3 cung nih kalpi hrimhrim lo ding a si fawn lai. Leng chuah tik ah hmurhuh aa huh bak lo mi, tibantuk cu thongthlak colh an si lai. A konglam le a ruang hal ding in lam an kham tik ah a zaam mi cu dawi peng an si lai i thla 2 chung phungning bantuk in thongthlak an si lai. Khuate in a ra mi zong nih hi phung hi an zulh hrimhrim a herh,” tiah Minister Pu Sui Thio nih The Hakha Post ah a chim.
Hi phung a pehzuultu ding le tuanvo latu ding hi; Penguk Zung, Ngandamnak, Sipin, La-Wa-Ka, Palek, Meithat Zung le Mino Bu tibantuk i bawm in an rengh cang lai. April 23 ah mizapi sin COVID-19 ralrinnak le fimchimhnak an tuah cang i April 24 zong ah an pek rih lai. April 27 thok cun a kong um loin a vaak mi le hmurhuh aa huh lo mi cu tlaih in thongthlak an si cang lai, tiah kan theih.
