2017 April thla i tuah mi Myanmar ram caankarlak thimnak ah teinak a hmu mi Amyotha Hluttaw Palai MP Pu Bawi Khing nih kum khat chung Amyotha Hluttaw meeting ah biahalnak 40 leng a tuah.
MP Pu Bawi Khing nih biahalnak 40 leng a tuah mi chung ah 35 cu bialehnak an tuah i 25 tuanchuah ding in hnatlak a si, tiah kan theih.
“Chin Ramkulh chung thingram kilven in hninhnoter than ding, sakah ngolter in a humhim mi tuuhmawng tuahpiak ding, Saisihchuak lam remh ding le hlei kong zong ka hal i tuan zong thawk an si cang. Cun, sianginn le pangpardum tuah ding ka hal mi zong tampi a um. Biahalnak hi 40 leng ka tuah,” tiah Chin Ramkulh Amyotha Hluttaw Palai Pu Bawi Khing nih The Hakha Post ah a chim.
MP Pu Bawi Khing nih biahalnak a tuah mi kong ah Thantlang Peng Pyithu Hluttaw Palai hlun Pi Za Tlem nih, “Hi biahalnak a tuah mi hi amah nih cun hal khawh ngai ah aa ruah men lai. MP ka rak tuan lio i voi khat meeting ka kai biahalnak ka tuah mi tluk lawng a si. A biahalnak 40 chung ah 25 tuanchuah mi zong hi Cozah pakhat nih kum khat chung tuan ding i hmaithlak mi ah cun a tlawm tuk. Hi ti ningte a si ahcun zeitin dah kan ram cu a thancho khawh lai,” tiah The Hakha Post ah a chim.
“Cozah lei an riantuan ning kong hi tampi kan hngal lo nain a tha tiah ka ruah ko. Kei hi cozah lei ah kaa teltum tuk lo. Khua le ram thanchonak ca ah zeidah rian a um ti mi tu hi a biapi in ka zoh i cucu hal peng kaa tim,” tiah MP Pu Bawi Khing nih a chimchap.
Biahalnak tuah mi kong ah MP hlun Pi Za Tlem nih, “Biahalnak ngan le biahalnak fa deuh in a um. Tuancolh awk a tha mi le tuancolh awk a tha lo mi a um ve. MP Pu Bawi Khing nih zei bantuk biahalnak dah a tuah ti mi cu kan hngal dih kho lo. Asinain kum khat biahalnak tuah mi ah cun a tlawm tuk. Hi lawng hin cun zeitin dah kan thancho khawh lai. Kei MP ka tuan lio ah cun voi khat meeting ka kai ah biahalnak 30 le 40 peng ka tuah. Kum nga chung ah biahalnak a thong tluk ka tuah lai. Cu chung ah zatuak 70 ka tlamtlinh tiah kaa ruah. MP Pu Bawi Khing nih kum khat chung biahalnak a tuah mi hi a tlawm tuk,” tiah a chimchap.
Chin Ramkulh, Amyotha Hluttaw Thantlang Peng Palai Pu Bawi Khing cu 2017 April ah tuah mi Myanmar ram caankarlak thimnak ah Amyotha Hluttaw MP a tling mi a si i kum khat le thla khat chung a tuan cang.
