America President Donald Trump le a nupi Melania Trump hna cu COVID-19 zawtnak an ngei tiah 2020 October 2 ah an thanh.
“Kan nupa in COVID-19 zawtnak an kan cheknak ah a phichuak positive kan si. Hi zawtnak in damnak kan hmuh zau nakhnga tha tein kan i thlop lai. Hi zawtnak hi kan pahnih in kan tuarpi ko lai,” tiah President Trump nih October 2 suimilaam 1:00AM tluk ah a Twitter ah a langhter.
Zawtnak an neih deuh hlan ah President Donald Trump i a kuttang minung pakhat sin in COVID-19 zawtnak an hmuh i, an nupa in Facility Quarantine ah an um tiah theih a si.
President Donald Trump hi kum 74 a si cang ca ah COVID-19 zawtnak in a thi kho ding dirhmun zong a si tiah CCN nih a langhter.
A kuttang minung pakhat COVID-19 zawtnak a ngei mi kong he pehtlai in President Donald Trump nih, “Keimah he naihniam in rian a tuan mi le a um mi ka kuttang minung pakhat sin in zawtnak hmuh a si. Hi ka minung pa hi rian zong aa zuam, i dinh caan zong a laa bal lo mi a si. Amah sin in zawtnak hmuh a si tik ah kan nupa zong zawtnak kan i chek. Cun, kanmah zong kan i erhkhumh,” tiah zawtnak an hmuh hlan deuh ahkhan a Twitter ah a tial.
President Donald Trump hi 2020 October 2 i Washington ah tuah ding mi zan-pung-ngun kawl dan biaruahnak le meepek sawmnak ah Florida ah kal ding a si nain atu bantuk in zawtnak a ngeih ca ah a khuallam zong phihpiak a si tiah Media nih an langhter. (Ref/ CCN)
