2020 November thla tuah mi Myanmar ram thimnak phi chuak cu ralkap nih thlen an i zuamnak cung ah America cozah nih thazaang hmang in a phi thlenternak a um si ahcun kan cohlang kho lai lo tiah Janaury 28 thawngfianhnak ah America ramleng pehtlaihnak ah lutlai a si mi pakhat nih a chim tiah theih a si.
Myanmar ram democracy lamthluan le Myanmar ram thimnak a phi chuak hna kha ralkap nih thlirh khawnhnak le thihphaihnak he thlen an i zuam mi hi America dirhmun in cun kan cohlang kho hrimhrim lo tiah chimnak nawlngei pakhat nih a chim tiah theih a si.
A liamcia 2020 November thla chung ah tuah mi Myanmar ram thimnak phi chuak cung ah ralkap lei in thimnak zung (UEC) cu mee dikfellonak nan tuah tiah sualpuhnak a ngeih hna i, rampi phunghram zong kan hrawh lai ti bantuk in bia an chimnak cung ah America ramdang he pehtlaihnak lutlai lei in hi bantuk in lehnak an tuah mi a si tiah theih a si.
Ralkap nih cacawn ni khat ni (January 27) ah an langhter mi ning incun Myanmar ram thimnak phi chuak chung ah mee dikfel lo 10 million tluk a um tiah an langhter. Nain rampi thimnak zung (UEC) nihcun rampi phung le Myanmar ram thimnak phung ning tein kan tuah mi a si ko tiah lehnak an tuah ve hna tiah theih a si.
(Ref: VOA)
