December 14 thawk in America mizapi sin ah COVID-19 zawtnak raikhamsii chunh hram an thawk cang tiah theih a si.
America hram bunh a si mi Pfizer le-BioNTech nih ser mi COVID-19 raikhamsii cu America nih a mizapi sin ah chunh hram a thawk cang i, hawi hlan ah papek in a chunhter mi hna cu COVID-19 mizaw a thloptu hna sii-inn riantuantu hna an si lai tiah theih a si.
Operation Warp Speed ah lutlai a si mi Gustave Perna nih “America ram chung hmun 145 ah December 13 ah COVID-19 raikhamsii a pha lai i, December 15 ahcun hmun 425 a pha kho cang lai. Cun a hnu bik hmun 66 hi December 16 ah a pha ve te lai,” tiah a chim.
America mizapi nih Pfizeer company ser COVID-19 raikhamsii an hmuh khawh ding aa rauhchannak zong thawnglatu hna sin ah chimnak a ngeih hna tiah theih a si.
A voi khatnak ah America mizapi minung million 3 sin ah chunhnak tuah hmasa a si lai. Culak ah micheu nihcun kum upa le cozah riantuantu pawl sin ah chunhhmasanak tuah sisehlaw tiah ruahnak chuahtu zong an um tiah theih a si. Nain mizeidah chunh hmasa awk an si lai timi cu mah le ramkulh cio nih an tuaktan te lai tiah theih a si.
Hi raikhamsii chunhnak kong he pehtlai in Gustave Perna nih “teinak kan hmuh lai tiah chim chung tuhi cu kan hrial rih ah a tha. Aruang cu, kan hmailei ah harnak tete kan ton te ding an um pah ko tiah kan zumh. Nain, kan dihlak dirti in a rak chuakmi buaibainak tete cu a phi kawl in tei kan izuam hna lai,” mizapi sin ah a chim.
America ram chung ahhin COVID-19 zawtnak aa chawnhbarh mi an dihlak ah minung 16 million an si cang i, COVID-19 zawtnak in a thi cang mi hna hi minung 3 million deng an si cang tiah theih a si.
America cozah nih Pfizer-BioNTech COVID-19 raikhamsii cu mizapi sin ah hman ding in December 12 ah cohlanak a rak tuah i, vawlei cung a ram 6 nak Pfizer-BioNTech ser COVID-19 raikhamsii a cohlantu a van si. (Ref: VOA)
