Yangon hrambunh in dirh mi Chinmi Funtomnak Bu ti mi All Chin Society nih Yangon khua tangka sing thong zakhat leng dih in inn pathum an sak lai, tiah tuanvo ngeitu sin in March 20 ah thawng kan theih.
“Hmaizarh chung ah hin hmun an kan pek mi hmun acre 4 cu sing 500 dih in kan kulh cang lai. Cun, hi project hi phun thum ah kan then. A phun khatnak cu Office ca ah pe 70’x30’ kau le tangka sing 1000 dih in tu kum chung ah lim khawh kan i zuam lai. Cun, a phun hnihnak cu Hall a si lai i sing thongkul hrawng dih ding in a kauh pe 200’x150’ le pe 40’ sang in kan sak lai. Inn tang ah City Mart (Shopping Mall) zong sakchih a si lai. 2019 Chin Miphun Ni hlan ah lim kan timh. Cun, a phun thumnak ah, dot 15 sang, pe 200’x100’ cu sing thong zakhat leng dih in sak than a si lai. Dot linak zawn ah tiliaunak (Swimming Pool) zong kan tuah lai. Thilhlun chiahnak (museum), Office, Meeting-room, Restaurant, Apartment, Harsa mi dornak, Hotel, Wedding-room le a tang ah motor dinhnak (car parking) tibantuk zong aa tel dih lai,” tiah All Chin Society Chairman Rev. Peter Ngun Za Cung nih The Hakha Post ah a chim.
Hi Bu hi Chin Ramkulh chung in miphun dihlak i tel in dirh mi phu a si. Mizo, Thado, Kuki, Zo, Asho Chin, Sungtu Chin tibantuk tiang i tel in dirh mi a si. Hihi Myanmar ram Vice President Pu Henry Van Thio nih Chinmi hi mah Pengtlang cio lawng si loin Chin ti mi ah i funtom khawhnak nunphung thuamthil ngeih ding a saduhthah mi kong ceihhmai hnu ah hi thil le riantuannak hi a chuak mi a si.
“Hi rian hi tangka tam tuk a dih ding a si tik ah ramchung ramleng Chin unau nih kan dirpi peng ko u. Chin Ramkulh Cozah zong nih tangka sing 100 an kan bawmh cang. A ngaingai cu hi kan thiltimh mi hi ramchung ramleng Chinmi dihlak ca ah siseh, miharsa hna i dornak hmun si kho seh, tiah saduhthahnak he kan thawk mi a si,” tiah ACS Chairman nih a chimchap.
Hi kong he pehtlai in All Chin Society nih March 13 ah Chin Ramkulh Cozah upa hna Chin thuamthil phuntling i hruk in an ton hna, tiah kan theih. Hi an thil timh mi hna hi Pu Henry Van Thio, Yangon Ramthen Chief Minister U Phyo Min Thein le Chin Ramkulh Cozah Chief Minister Pu Salai Lian Luai nih an hngalhpi mi hna a si.
